astana+ / қоғам · әлеумет
Локация: Астана
Кімге арналған: Ата-аналар мен түлектер
Плюс нысанасында: мектеп бітіру ережесі · 40 мың түлек · 18 маусым
Биыл елордада мектеп бітіру кештері тек білім ордаларының ішінде ғана ұйымдастырылады. Мейрамхана жалдау, қымбат көлік шеруі (кортеж), аниматорлар шақыру және ақша жинау — бұл жолы қатаң бақылауда болады. Оқу жылы дәстүрлі түрде 25 мамырда аяқталып, аттестат тапсыру рәсімі 18 маусымға жоспарланған.
Биыл елордада 16 мыңнан астам 11-сынып оқушысы және 24 мыңнан астам 9-сынып түлегі мектеп бітіреді. Астанадағы 206 мектепте жалпы саны 315 мыңға жуық бала білім алуда. Ал республика бойынша биыл 215 мыңнан астам өрен алтын ұясынан ұшқалы отыр.
#АстанаПлюсФакт
Не нәрсеге шектеу қойылды және не істеуге рұқсат?
Қатаң тыйым салынады:
- Мейрамхана, дәмхана және өзге де ойын-сауық орындарында мектеп бітіру кешін өткізуге;
- Салтанатты шараларды ұйымдастыру үшін ата-аналардан ақша жинауға;
- Қымбат көліктермен шеру (кортеж) жасауға;
- Аниматорлар мен мерекелік агенттіктерді шақыруға;
- Мектеп әкімшілігі мен мұғалімдерге қымбат сыйлықтар әперуге ақша жинауға.
Рұқсат етіледі:
- Аттестаттарды салтанатты түрде табыстауға;
- Мектеп ішінде құттықтау концерттерін, сынып сағаттарын өткізуге;
- Кез келген ресми шараларды тек мектеп қабырғасында ұйымдастыруға.
Ресми рәсімдер аяқталған соң, Білім басқармасы Полиция департаментімен және аудандық әкімдіктермен бірлесіп, осы талаптардың сақталуын қадағалау үшін арнайы рейдтер жүргізеді.
#АстанаПлюсКонтекст
Бұл шектеулер неліктен маңызды?
Дүркіретіп мектеп бітіру кешін өткізуге шектеу қою — Қазақстан үшін жаңалық емес. Оқу-ағарту министрлігінің бұйрығы бұрыннан бар, бірақ оның орындалуы әр өңірде әртүрлі болып келді. Биыл Астананың Білім басқармасы бұл ережені ерте бастан және ешқандай екіұштылықсыз, нақты ескертуді жөн көрді.
Astana+ түйіні: Кортеж бен зәулім мейрамханаларға тыйым салу — бұл жай ғана «жаппай үнемдеу» емес. Бұл — мектеп бітіру кешінің ата-аналар арасындағы «әмиян жарысына» айналып кетпеуінің алдын алу. Бұл күн — барлық бала үшін тең дәрежедегі ортақ мереке және ол мектеп қабырғасында қалуы тиіс.
25 мамырда — соңғы қоңырау, 18 маусымда — аттестат тапсыру. Қалған дүниенің бәрі — белгіленген ережеге бағынады.