Новости | Деньги

Қазақстанда азық-түлік импортына тәуелділікті азайту үшін 200-ден астам жоба іске қосылады

Қазақстан импорттық ауыл шаруашылығы өнімдерін отандық өндіріс есебінен алмастыруды көздеп отыр. Елде жалпы құны 2,3 трлн. теңгені құрайтын ауыл шаруашылығы шикізатын терең қайта өңдеу бойынша 200-ден астам жоба іске қосылады. Бұл туралы Үкімет отырысында “Бәйтерек” холдингі басқарма төрағасы Рустам Қарағойшин мәлімдеді.

Мәселе шикізатта емес- дайын өнімде. Ет комбинаттары, сүт зауыттары, тері мен жүнді қайта өңдеу цехтары. Барлығы – 208 жоба іріктелген. Мақсаты қарапайым: шетелден аз сатып алу, ел ішінде көп өндіру. Бірақ қаржыландыру тетігі де өзгеруде.

Мемлекет металлургия, химия және агроөнеркәсіп кешенінде импортты алмастыра алатын 15–20 ірі индустриялық зауытқа басымдық береді.

Ал құны 7 млрд. теңгеге дейінгі шағын жобалар екінші деңгейдегі банктер арқылы мемлекеттік кепілдікпен қаржыландырылады.

Биліктің есебінше, осылайша қаржы кәсіпорындарға тезірек жетеді.

Индустриялық блок

Бір мезгілде металлургия саласында 3,9 трлн. теңгеге 23 жоба бойынша жұмыстар жалғасуда.

Қазіргі уақытта жалпы құны 3,4 трлн. теңгені құрайтын 449 инвестициялық жоба пулы қалыптастырылған.

Қазақстан Даму банкі шикізаттық емес экспортты қолдауға 2 трлн. теңге бағыттайды.

Ал Аграрлық несие корпорациясы мен ҚазАгроҚаржы тамақ өнеркәсібі жобаларын 1 трлн. теңгеге қаржыландыруды қамтамасыз етеді.

«Басты бағыт – жоғары құнды дайын өнім шығаруға көшу және импортты алмастыру», – деді Рустам Қарағойшин.

Қазіргі таңда Қазақстан көптеген позициялар бойынша – өңделген өнімдерден бастап өнеркәсіптік химияға дейін – әлі де импортқа тәуелді. Енді негізгі басым бағыт – отандық кәсіпорындарға.

Басты сұрақ өзгермейді: бұл зауыттар нарыққа қаншалықты жылдам шығып, баға жағынан бәсекеге қабілетті бола ала ма?

Қазақстанда мұнай өңдеу көлемі жылына 40 млн. тоннаға дейін өседі. Қайта өңдеу қуаты екі есе ұлғаяды

Қазақстанда бензин мен дизель отынының көлемі артады. 2033 жылға қарай мұнай өңдеу қуаты қазіргі 18,4 млн. тоннадан жылына 40 млн. тоннаға дейін ұлғаяды. Бұл туралы Үкімет отырысында Энергетика министрлігі хабарлады.

Қазіргі уақытта елде жылына 18,4 млн. тонна мұнай өңделеді.

2033 жылға қарай бұл көрсеткіш 40 млн. тоннаға жетуі тиіс.

Жұмыс істеп тұрған мұнай өңдеу зауыттары жоспарлы түрде кеңейтіледі. Бұл 2030 жылға қарай дизель отынының тапшылығын жоюға мүмкіндік береді.

Ал 2033 жылы қуаты жылына 10 млн. тонна болатын жаңа мұнай өңдеу зауыты іске қосылады.

Қайта өңдеу 94–95%-ға дейін өседі. Отын сапасы К5 стандартына жеткізіледі.

«2033 жылы төртінші зауытты іске қосу есебінен авиакеросин тапшылығы толық жойылады және К5 стандартындағы жоғары сапалы мұнай өнімдерін экспорттау басталады», – деді энергетика вице-министрі Қайырхан Тұтқышбаев.

Газ бағыты
Сонымен қатар Қашаған кен орнында газ өңдеу қуаттарын арттыру жұмыстары жүргізілуде. Мұнда екі газ өңдеу зауытының құрылысы жоспарланған.

Бірінші зауыттың қуаты – жылына 1 млрд. текше метр. Құрылыс жұмыстарының 55%-ы аяқталған, іске қосу 2026 жылдың соңына жоспарланған.

Екінші зауыттың қуаты – жылына 2,5 млрд. текше метр, қазіргі уақытта жобалау жұмыстары жүріп жатыр.

2032 жылға қарай тауарлық газ өндіру көлемі жылына 32,3 млрд. текше метрге дейін өседі.

Қазақстан ұзақ уақыт бойы ең жоғары сұраныс маусымында отын тапшылығына тап болып келеді. Жаңа қуаттардың іске қосылуы бұл мәселені шешіп, импортқа тәуелділікті азайтуға тиіс. Үкіметте отын тапшылығы жойылып, ел көрші мемлекеттерге жанар-жағармай экспорттай алады деп сендіреді.